6. kafli - Viðræður Þórólfs ok Kveld-Úlfs.

Þórólfr Kveld-Úlfsson ok Eyvindr lambi kómu um haustit heim ór víking. Fór Þórólfr til föður síns.

Taka þeir feðgar þá tal sín í milli. Spyrr Þórólfr eftir, hvat verit hefir í erendum þeira manna, er Haraldr sendi þangat. Kveld-Úlfr sagði, at konungr hafði til þess orð sent, at Kveld-Úlfr skyldi gerast maðr hans eða sonr hans annarr hvárr.

“Hvernig svaraðir þú?” kvað Þórólfr.

“Ek sagða svá, sem mér var í hug, at ek mynda aldri ganga á hönd Haraldi konungi ok svá myndið þit gera báðir, ef ek skylda ráða. Ætla ek, at þær lykðir muni á verða, at vér munim aldrtila hljóta af þeim konungi.”

“Þá verðr allmjök á annan veg,” sagði Þórólfr, “en mér segir hugr um, því at ek ætla mik skulu af honum hljóta inn mesta frama, ok til þess emek fastráðinn at fara á fund konungs ok gerast hans maðr, ok þat hefi ek sannspurt, at hirð hans er skipuð afreksmönnum einum. Þykkir mér þat allfýsiligt at koma í þeira sveit, ef þeir vilja við mér taka. Eru þeir menn haldnir miklu betr en allir aðrir í þessu landi. Er mér svá frá sagt konungi, at hann sé inn mildasti af fégjöfum við menn sína ok eigi síðr þess örr at gefa þeim framgang ok veita ríki þeim, er honum þykkja til þess fallnir. En mér spyrst á þann veg til um alla þá, er bakverpast vilja við honum ok þýðast eigi hann með vináttu, sem allir verði ekki at manna, stökkva sumir af landi á brott, en sumir gerast leigumenn. Þykkir mér þat undarligt, faðir, um svá vitran mann sem þú ert ok metnaðargjarnan, er þú vildir eigi með þökkum taka vegsemð þá, er konungr bauð þér. En ef þú þykkist vera forspár um þat, at vér munim hljóta af konungi þessum ófarnað ok hann muni vilja vera várr óvinr, hví fórtu eigi þá til orrostu í móti honum með konungi þeim, er þú ert áðr handgenginn? Nú þykkir mér þat ósæmiligast at vera hvárki vinr hans né óvinr.”

“Eftir gekk þat,” kvað Kveld-Úlfr, “er mér bauð hugr um, at þeir myndi engir sigrför fara, er börðust við Harald lúfu norðr á Mæri. En slíkt sama mun þat vera satt, at Haraldr mun verða at miklum skaða mínum frændum. En þú, Þórólfr, munt ráða vilja athöfnum þínum. Ekki óttumst ek þat, þóttú komir í sveit með hirðmönnum Haralds, at eigi þykkir þú hlutgengr eða jafn inum fremstum í öllum mannraunum. Varast þú þat, at eigi ætlir þú hóf fyrir þér eða keppist við þér meiri menn. En eigi muntu fyrir vægja at heldr.”

En er Þórólfr bjóst á brott, þá leiddi Kveld-Úlfr hann ofan til skips, hvarf til hans ok bað hann vel fara ok bað þá heila hittast.