23. kafli - Dráp Hildiríðarsona.

Ketill hængr hét maðr, sonr Þorkels Naumdælajarls ok Hrafnhildar, dóttur Ketils hængs ór Hrafnistu. Hængr var göfugr maðr ok ágætr. Hann hafði verit inn mesti vinr Þórólfs Kveld-Úlfssonar ok frændi skyldr. Hann var þá í úthlaupi því, er liðsafnaðr var á Hálogalandi ok menn ætluðu til liðs við Þórólf, svá sem fyrr var ritat. En er Haraldr konungr fór norðan ok menn urðu þess varir, at Þórólfr var af lífi tekinn, þá rufu þeir safnaðinn. Hængr hafði með sér sex tigu manna, ok sneri hann til Torga, en þar váru fyrir Hildiríðarsynir ok höfðu fátt lið. En er Hængr kom á bæinn, veitti hann þeim atgöngu. Fellu þar Hildiríðarsynir ok þeir menn flestir, er þar váru fyrir, en þeir Hængr tóku fé allt, þat er þeir fengu.

Eftir þat tók Hængr knörru tvá, þá er hann fekk mesta, lét þar bera á út fé þat allt, er hann átti ok hann mátti með komast. Hann hafði með sér konu sína ok börn, svá þá menn alla, er at þeim verkum höfðu verit með honum. Baugr hét maðr, fóstbróðir Hængs, ættstórr maðr ok auðigr. Hann stýrði öðrum knerrinum. En er þeir váru búnir ok byr gaf, þá sigldu þeir í haf út.

Fám vetrum áðr höfðu þeir Ingólfr ok Hjörleifr farit at byggja Ísland, ok var mönnum þá alltíðrætt um þá ferð. Sögðu menn þar vera allgóða landkosti.

Hængr sigldi vestr í haf ok leitaði Íslands. En er þeir urðu við land varir, þá váru þeir fyrir sunnan at komnir. En fyrir því at veðr var hvasst, en brim á landit ok ekki hafnligt, þá sigldu þeir vestr um landit fyrir sandana. En er veðrit tók minnka ok lægja brim, þá varð fyrir þeim áróss mikill, ok heldu þeir þar skipunum upp í ána ok lögðu við it eystra land. Sú á heitir nú Þjórsá, fell þá miklu þröngra ok var djúpari en nú er. Þeir ruddu skipin, tóku þá ok könnuðu landit fyrir austan ána ok fluttu eftir sér búfé sitt. Var Hængr inn fyrsta vetr fyrir útan Rangá ina ytri. En um várit kannaði hann austr landit ok nam þá land milli Þjórsár ok Markarfljóts á milli fjalls ok fjöru ok byggði at Hofi við Rangá ina eystri.

Ingunn, kona hans, fæddi barn um várit, þá er þau höfðu þar verit inn fyrsta vetr, ok hét sveinn sá Hrafn. En er hús váru þar ofan tekin, þá var þar síðan kallat Hrafntóftir.

Hængr gaf Baugi land í Fljótshlíð ofan frá Merkiá til árinnar fyrir útan Breiðabólstað, ok bjó hann at Hlíðarenda, ok frá Baugi er komin mikil kynslóð í þeiri sveit. Hængr gaf land skipverjum sínum, en seldi sumum við litlu verði, ok eru þeir landnámamenn kallaðir.

Stórólfr hét sonr Hængs. Hann átti Hválinn ok Stórólfsvöll. Hans sonr var Ormr inn sterki. Herjólfr hét annarr sonr Hængs. Hann átti land í Fljótshlíð til móts við Baug ok út til Hválslækjar. Hann bjó undir Brekkum. Sonr hans hét Sumarliði, faðir Vetrliða skálds. Helgi var inn þriði sonr Hængs. Hann bjó á Velli ok átti land til Rangár it efra ok ofan til móts við bræðr sína. Vestarr hét inn fjórði sonr Hængs. Hann átti land fyrir austan Rangá, milli ok Þverár, ok inn neðra hlut Stórólfsvallar. Hann átti Móeiði, dóttur Hildis ór Hildisey. Þeira dóttir var Ásný, er átti Ófeigr grettir. Vestarr bjó at Móeiðarhváli. Hrafn var inn fimmti Hængs sonr. Hann var fyrstr lögsögumaðr á Íslandi. Hann bjó at Hofi eftir föður sinn. Þórlaug var dóttir Hrafns, er átti Jörundr goði. Þeira sonr var Valgarðr at Hofi. Hrafn var göfgastr sona Hængs.